Thu, 24 Jan 2013 23:08:23 +0000
കെ. അഷ്റഫ്
ചില കണക്കുകള്
ജഫ്രി ലോയും ഗെയറും നല്കുന്നതനുസരിച്ച്, 2001ലെ സെന്സസ് പ്രകാരം ഇന്ത്യയില് 35.7 ശതമാനം ആളുകള് നഗരത്തിലാണു താമസിക്കുന്നത്. പാഴ്സികളെയും ജൂതരെയും മാറ്റിനിര്ത്തിയാല് മുസ്്ലിംകളാണ് ഇന്ത്യയിലെ ഏറ്റവും വലിയ നഗരവല്കൃത ന്യൂനപക്ഷം. മുസ്്ലിംകള് ഇന്ത്യയിലെ ആകെ ജനസംഖ്യയുടെ 13.4 ശതമാനം മാത്രമാണ് ഉള്ളതെങ്കില് നഗരങ്ങളില് മുസ്്ലിം ജനസംഖ്യ 16.9 ശതമാനമാണ്. ഇങ്ങനെ വരുമ്പോള് മുസ്്ലിംകള് ഒരു നഗരകേന്ദ്രീകൃത ന്യൂനപക്ഷമാണ്. ഇങ്ങനെയുള്ള കണക്കുകള് പരിശോധിക്കുമ്പോള് ശ്രദ്ധേയമായ ഒരു കാര്യം, 1980കളിലും 90കളിലും മുസ്്ലിം നഗരജനസംഖ്യാ ശതമാനം കുത്തനെ താഴുന്നു എന്നതാണ്. കാരണം, 1947നു ശേഷം ഇന്ത്യ കണ്ട മുസ്്ലിംവിരുദ്ധ കലാപങ്ങള് 80കളിലും 90കളിലും നഗരങ്ങളിലാണു നടന്നത്. ഇത് ഒട്ടും വികസിതമല്ലാത്ത ഗ്രാമങ്ങളിലേക്കുള്ള കൂട്ടപ്പലായനത്തിലാണു മുസ്്ലിംകളെ കൊണ്ടുചെന്നെത്തിച്ചത്. സാഹിത്യ-സാംസ്കാരിക സ്ഥാപനങ്ങള് റൊമാന്റിസൈസ് ചെയ്ത “ഗാന്ധിയന് ഗ്രാമീണ ഇന്ത്യ’ എന്ന ജാതിഘടനയ്ക്ക് ഇളക്കം സംഭവിക്കാത്ത ഇടങ്ങളിലാണ് അവര് വന്നു പതിച്ചത്.
തീര്ച്ചയായും മറ്റു സമുദായങ്ങളെ അപേക്ഷിച്ച് മുസ്്ലിംകള് ഒരു നഗരവല്കൃത സമുദായമാണ്. എന്നാല്, ദാരിദ്യ്രത്തിന്റെ തോത് ഗ്രാമത്തിലെ മുസ്്ലിംകളെ അപേക്ഷിച്ച് നഗരത്തിലെ മുസ്്ലിംകള്ക്കിടയില് വളരെ കൂടുതലാണ്. 1999-2000 ലെ ദേശീയ സാംപിള് സര്വേ പ്രകാരം നഗരത്തിലെ മുസ്്ലിം ദാരിദ്യ്രത്തിന്റെ തോത് ഹിന്ദുക്കളെ അപേക്ഷിച്ച് 15 ശതമാനം കൂടുതലാണ്.
ലോകത്തുതന്നെ നഗരത്തിലെ ന്യൂനപക്ഷ സംസ്കാരവുമായി ബന്ധപ്പെട്ടാണ് ‘ഗെറ്റോ’ എന്ന വാക്ക് രൂപപ്പെടുന്നത്. ഇന്ത്യയില് മുസ്്ലിംകളുടെ നഗരജീവിതത്തെ കുറിക്കുന്ന ഒരു പദവും പ്രയോഗവുമാണ് ‘ഗെറ്റോ’ എന്നത്. ഈയിടെ കൊല്ക്കത്തയിലെ മുസ്്ലിം ചേരികളെക്കുറിച്ച് പുറത്തിറങ്ങിയ ഒരു പുസ്തകത്തിന്റെ പേരു തന്നെ ഇന്ത്യാസ് മുസ്്ലിം ഗെറ്റോ എന്നാണ്. ഇന്ത്യയില് ഗെറ്റോ എന്ന വാക്കിന്റെ അര്ഥം തന്നെ നഗരങ്ങളില് മുസ്ലിംകള് തിങ്ങിത്താമസിക്കുന്ന ഇടമെന്നായി മാറിയിരിക്കുന്നു. മാത്രമല്ല, മുസ്്ലിം ഗെറ്റോ എന്ന പ്രയോഗം രാഷ്ട്രീയവിദഗ്ധരും അക്കാദമീഷ്യന്മാരും മാധ്യമങ്ങളും വലിയ പരിശോധനകളൊന്നുമില്ലാതെ എടുത്തുപയോഗിക്കുന്നുണ്ട്. സച്ചാര് കമ്മിറ്റി റിപോര്ട്ടില് ഇടതടവില്ലാതെ ഈ വാക്ക് ഒരു മുസ്ലിം പ്രതിനിധാനം എന്ന നിലയില് കണ്ടുവരുന്നുണ്ട്. ഏറ്റവും കൌതുകകരമായ വസ്തുത യഹൂദരുടെ വാസസ്ഥലങ്ങളെന്നു പ്രധാനമായും സൂചിപ്പിച്ചിരുന്ന ഗെറ്റോ എന്ന ഇംഗ്ളീഷ് വാക്കിന് മറ്റിന്ത്യന് ഭാഷകളില് സമാനമായ വിവര്ത്തനങ്ങള് വളരെ കുറവാണ്. ഉള്ള വിവര്ത്തനങ്ങള്ക്ക് അത്ര തീക്ഷ്ണതയുമില്ല. എങ്ങനെയാണ് ഗെറ്റോ എന്ന ഇംഗ്ളീഷ് വാക്ക് നഗരങ്ങളിലെ മുസ്്ലിംജീവിതത്തെക്കുറിക്കുന്ന ഒന്നായി വികസിച്ചതെന്ന സൂചനകളൊന്നും പുസ്തകം നല്കുന്നില്ല. എന്നാല്, മുസ്്ലിംകളുടെ സങ്കുചിതമനസ്സ്, ദേശവിരുദ്ധത തുടങ്ങിയവ കുറിക്കാന് ഗെറ്റോ മനസ്ഥിതി എന്ന വാക്ക് ഉപയോഗിച്ചുവരുന്നതായി ഗ്രന്ഥകാരന്മാര് നിരീക്ഷിക്കുന്നു. ഗെറ്റോ എന്ന വാക്കിന്റെ രൂപീകരണം ഹിന്ദു-മുസ്്ലിം പ്രശ്നം എന്ന നിലയില് കാണാന് എഡിറ്റര്മാര് ആവുന്നതു ചെയ്യുന്നുണ്ട്. ഇങ്ങനെയൊരു സമീപനം ഇന്ത്യയുടെ സവിശേഷസന്ദര്ഭത്തില് മുസ്്ലിംകള്=ആധുനികവിരുദ്ധത=മതേതരവിരുദ്ധത എന്ന വിശകലനത്തിലേക്കു നയിക്കുക എളുപ്പമാണ്. ഗെറ്റോവിനെക്കുറിച്ചുള്ള വിശദമായ അന്വേഷണങ്ങളിലേക്കുള്ള സൂചനകള് പുസ്തകം നല്കുന്നു. “ ബലമായി പിന്നിലേക്കു തള്ളപ്പെട്ട, നിഷേധരൂപത്തില് പ്രതിഛായയുള്ള ജനങ്ങള് താമസിക്കുന്ന, വംശപരമായും മതപരമായും ഐകരൂപ്യമുള്ള ഒരിടമാണ് ഗ്രന്ഥകാരന്മാര് നിര്വചിക്കുന്ന ഗെറ്റോ.(പുറം: 21)
കോഴിക്കോടിനെക്കുറിച്ച്
മലയാളത്തിലെ ഒരു മുന്നിര എഴുത്തുകാരന് കോഴിക്കോട് മുസ്്ലിം തീവ്രവാദത്തിന്റെ ഹബ്ബായതിനാല് താനിവിടെ വരാന് ഭയക്കുന്നുവെന്നു പറഞ്ഞിരുന്നു. സവര്ണ വീരനായക സിനിമകളില്നിന്നു പുറത്തുകടക്കാന് ശ്രമിച്ച ഒരു സിനിമാസംവിധായകന് തന്റെ സാഹിത്യാഭിരുചിയുള്ള നായകനെ കൊല്ലുന്നത് കോഴിക്കോട്ടു നടക്കുന്ന ഒരു ബോംബ് സ്ഫോടനത്തിലൂടെയാണ്. കോഴിക്കോട്ടെ പുസ്തകശാലകള്, ഭക്ഷണശാലകള്, വസ്ത്രാലയങ്ങള് തുടങ്ങി ലൈംഗികാഭിരുചികള് വരെ ഇങ്ങനെ സവിശേഷമായ സാംസ്കാരിക പോലിസിങിനു വിധേയമാകുന്നുവെന്നു നമുക്കറിയാം. കാരണം, കേരളത്തിലെ മറ്റു നഗരങ്ങളെ അപേക്ഷിച്ച് കോഴിക്കോടിനു കൂടുതലുള്ള, അതിനെ അടയാളപ്പെടുത്താന് കഴിയുന്ന സവിശേഷതയായ മുസ്്ലിം മതപരതയാണ്.
പ്രസ്തുത പഠനത്തില് തന്നെ കോഴിക്കോടന് മുസ്്ലിംകളുടെ സാര്വദേശീയ-പ്രാദേശിക സവിശേഷതകളെക്കുറിച്ച് നിരവധി സൂചനകളുണ്െടങ്കിലും അതൊരു മുഖ്യ ഐഡന്റിഫിക്കേഷനായി ലേഖനം കാണുന്നില്ല. മുസ്ലിം പ്രശ്നം ‘ദേശീയ’ പ്രശ്നമാവുന്നത് 80കളിലും 90കളിലും ശക്തിപ്പെട്ട നവ സവര്ണ ഹിന്ദു ദേശീയ ഉല്ക്കണ്ഠകളുടെ ഭാഗമായി മുസ്ലിമിനെ ദേശീയമായി നിര്മിക്കുന്ന ഒരു പ്രക്രിയയുടെ ഭാഗമായാണ്. മുസ്ലിമിനെ ഒരു ‘ദേശീയപ്രശ്നമായി നിര്മിക്കുന്ന സമീപനങ്ങള് ഒരുപരിധിവരെ സഹായിക്കുന്നതു മേല്പ്പറഞ്ഞ മേല്ക്കോയ്മാ ധാരണകളെയാണ്. മുസ്്ലിമിന്റെ മറ്റു തരത്തിലുള്ള പ്രദേശപരമായ സവിശേഷതകളെ ഗൌരവമായി കണക്കിലെടുക്കുന്ന ഒരു അന്വേഷണരീതി ഇനിയും വികസിച്ചിട്ടുവേണം.
മറ്റൊരു കേസായി നല്കുന്നത് ലൌജിഹാദാണ്. ലൌജിഹാദിനെക്കുറിച്ചുള്ള വിവരണത്തിലും ഇങ്ങനെയൊരു അട്ടിമറിയുണ്ട്. ഒരു മുസ്ലിം യുവാവുമായി ബന്ധപ്പെട്ട പ്രണയക്കുരുക്കിനെ കുറിച്ച് കോടതിയും ഗവണ്മെന്റും നല്കിയ റിപോര്ട്ടുകള് സമര്ഥമായി മറച്ചുവച്ചിരിക്കുന്നു. മാത്രമല്ല, ലൌജിഹാദുമായി ബന്ധപ്പെട്ട് പുകള്പെറ്റ ദേശീയപത്രങ്ങള് നടത്തിയ മുസ്്ലിംവിരുദ്ധ കാംപയിന് ഒന്നു പരാമര്ശിക്കാന് പോലും പഠനം ധൈര്യം കാണിക്കുന്നില്ല. എന്നാല്, വിഷുവിനു പടക്കം പൊട്ടിക്കുന്ന ശബ്ദം പോലും ഇല്ലാതിരുന്ന 2006ലെ കോഴിക്കോട് ഇരട്ടസ്ഫോടനത്തെക്കുറിച്ചു ഉച്ചപ്പത്രങ്ങളെ നാണിപ്പിക്കുന്ന തരത്തിലാണു വിവരണങ്ങളുള്ളത്. ഈ സ്ഫോടനവുമായി ബന്ധപ്പെട്ട് അബ്ദുന്നാസര് മഅ്ദനിയെ ലശ്കറെ ത്വയ്യിബയുമായി ബന്ധപ്പെടുത്തി വന്ന പത്ര റിപോര്ട്ടുകളുടെ സ്വാധീനവും ഇവിടെ കാണാന് കഴിയുന്നു. പത്രവാര്ത്തകള്ക്കും ഊഹങ്ങള്ക്കുമപ്പുറം പോവാന് കഴിയാതെ മുസ്്ലിമിനെ സംഭവത്തിന്റെ നിഴലില് നിര്ത്തി സംസാരിക്കുന്ന പതിവു “നിഷ്പക്ഷ’ ഗവേഷണമാണിതെന്നു പറയേണ്ടിവരും.
പാര്ശ്വവല്ക്കരണത്തിന്റെ അവസാനം
ഇന്ത്യന് മുസ്്ലിംകളുടെ നഗരജീവിതത്തെക്കുറിച്ചുള്ള ഈ പഠനം ധാരാളം പിഴവുകളുള്ളതോടൊപ്പം തന്നെ ഭാവി അന്വേഷണത്തിലേക്കു നിരവധി വാതിലുകള് തുറക്കുന്നുമുണ്ട്. പാര്ശ്വവല്ക്കരണത്തിന്റെ ഇരകള് എന്ന തരത്തില് മാത്രം മുസ്്ലിംകളെ കാണുന്നതിനുപകരം അതില്നിന്നു കുതറിമാറുന്ന മുസ്്ലിം രാഷ്ട്രീയാനുഭവങ്ങളെ പുസ്തകം വേണ്ടത്ര പരിഗണിക്കുന്നില്ല. മാത്രമല്ല, അങ്ങനെയുള്ള നവീന രാഷ്ട്രീയ അനുഭവങ്ങളെ സവിശേഷമായി പരിഗണിക്കുന്നതിനു പകരം “തീവ്രവാദം’ പോലുള്ള പതിവു ഫ്രെയിമുകളിലേക്കു പുസ്തകത്തിലെ പല പഠനങ്ങളും വഴുതുന്നുണ്ട്. പുസ്തകത്തിലെ മിക്ക പഠനങ്ങളും വിശകലനാത്മകം എന്നതിലപ്പുറം വിവരണാത്മകമാണ്. സ്ഥിതിവിവരണക്കണക്കുകള്, അവയിലൂന്നിയുള്ള വിശകലനങ്ങള്, ഇവയില് ശ്രദ്ധിക്കുന്ന പഠനം, പ്രസ്തുത റഫറന്സുകളെ തന്നെ സാധ്യമാക്കുന്ന സാമൂഹികതത്ത്വം, പ്രചോദനം എന്നിവയെ അത്രകണ്ടു പരിഗണിക്കുന്നില്ല. ഇന്ത്യയില് മുസ്ലിം എന്ന ഗണം ഭാവന ചെയ്യപ്പെടുന്നതിന്റെ സൂക്ഷ്മ അധികാരങ്ങള് പലപ്പോഴും മുന് സമര്പ്പണങ്ങള് റദ്ദു ചെയ്യുന്നു. വളരെയെളുപ്പം സാധ്യമാവുന്ന ഇത്തരം പുസ്തകങ്ങളുടെ മുഖ്യബലഹീനതയും ഇതുതന്നെയാണ്.
Muslims In Indian Cities: Trajectories Of Marginalisation
Edited by Laurent Gayer and christophe Jaffrelot (Harper Collins 2012)
http://www.thejasnews.com/index.jsp?tp=det&det=yes&news_id=20130012417382323&
.jpg)
0 comments:
Post a Comment